سياسة الخصوصية

مين مسؤول عن بياناتك؟

«حَضـور» أداة بيستخدمها منظّم الإيفينت. لما تسجّل في إيفينت، بياناتك بتروح للمنظّم ده وهو المسؤول عنها وعن قراره يجمع إيه ويستخدمها في إيه.

إحنا بنشغّل النظام نيابةً عنه — بنخزّن ونعالج البيانات بالقدر اللي الخدمة محتاجاه، ومش بنبيعها ولا بنستخدمها في إعلانات ولا بنشاركها مع إيفينتات تانية. كل منظّمة بياناتها معزولة عن غيرها.

يعني لو عايز تعرف ليه اتطلب منك تليفونك، أو عايز تمسح بياناتك من إيفينت — كلّم المنظّم الأول.

بنجمع إيه بالظبط؟

لما تسجّل في إيفينت

• اسمك وإيميلك — إجباريين، عشان التذكرة توصلك ونعرفك على الباب.
• تليفونك وجهة عملك — لو المنظّم طلبهم.
• نوع التذكرة اللي اخترته.

وأنت بتستخدم النظام

• وقت دخولك للإيفينت ومين من الموظفين مسح كودك، ووقت دخولك لكل جلسة.
• عنوان الـ IP — بيتسجّل مؤقتاً عشان نمنع السبام على فورم التسجيل. مش مربوط بملفك الشخصي.
• سجل الرسايل اللي اتبعتتلك (إمتى واتبعتت ولا لأ).

لو الإيفينت مدفوع

• إيصال التحويل لو دفعت يدوياً (إنستاباي · محفظة · تحويل بنكي). الصورة دي بتتخزّن في مكان مقفولوبتتقرا برابط مؤقّت صلاحيته 1 ساعة، وبيشوفها المنظّم عشان يراجع الدفع.
• مبلغ الدفعة وحالتها ورقم العملية عند بوابة الدفع.

⚠️ إحنا مبنشوفش بيانات الكارت خالص. لما تدفع بكارت، بتتحوّل لصفحة بوابة الدفع وبتدخل بياناتك عندهم. رقم الكارت وتاريخه والكود السري مبيعدّوش على سيرفراتنا أبداً.

كود الـ QR بتاعك

الكود اللي في تذكرتك مفيهوش أي بيانات شخصية — لا اسمك ولا إيميلك. هو رقم عشوائي بس، والنظام هو اللي بيعرف الرقم ده بتاع مين.

بس الرقم ده هو التذكرة نفسها: أي حد معاه يقدر يفتح تذكرتك ويعدّل حجزك. متشاركهوش ومتنشرش صورة التذكرة على السوشيال.

مين بيشوف بياناتك؟

• المنظّم وفريقه — دول اللي سجّلت عندهم.
• مزوّدو الخدمة اللي بنشتغل بيهم: استضافة الداتابيز والتخزين · خدمة إرسال الإيميل · بوابة الدفع (لو الإيفينت مدفوع) · استضافة الموقع. كل واحد فيهم بياخد الحد الأدنى اللي شغله محتاجه.
• الجهات الرسمية — لو فيه إلزام قانوني.

صفحة إدارة المنصة عندنا بتعرض أرقام مجمّعة بس — مبتعرضش اسم ولا إيميل ولا تليفون أي حاضر.

بتفضل قد إيه؟

• بيانات حجزك بتفضل طول ما المنظّم محتفظ بالإيفينت. لو ألغيت حجزك، بنعلّمه ملغي ومبيتشالش فوراً — عشان المنظّم يقدر يراجع اللي حصل ويرجّعه لو الإلغاء كان بالغلط.
• النسخ الاحتياطية بتفضل 30 يوم وبعدين بتتمسح تلقائياً.
• سجل الأخطاء التقني بيتمسح بعد 30 يوم، والتوكنات بتتشال منه قبل ما يتسجّل.

حقوقك

من حقك تعرف بياناتك المحفوظة، وتصحّحها، وتطلب مسحها، وتسحب موافقتك على التواصل. الطريق الأسرع هو المنظّم — هو صاحب القرار في بيانات إيفينته، وإحنا بننفّذ طلبه.

ولو حجزك لسه شغّال، تقدر تعدّل بياناتك أو تلغي حجزك بنفسك من رابط الإدارة اللي في إيميل التأكيد.

الحقوق دي متسقة مع قانون حماية البيانات الشخصية المصري رقم ١٥١ لسنة ٢٠١٨.

الأمان

• الاتصال بالموقع كله مشفّر (HTTPS).
• إيصالات الدفع في مساحة مقفولة، وبتتفتح بروابط مؤقّتة بس.
• كل منظّمة معزولة عن غيرها، والوصول محصور بفريقها.
• بنسجّل الأخطاء التقنية عشان نصلّحها، وبنشيل منها أي توكن.

مفيش نظام مؤمّن ١٠٠٪. لو حصل اختراق بيمسّ بياناتك، هنبلّغ المنظّم عشان يبلّغ المتأثرين.

الأطفال

الخدمة موجّهة للبالغين. لو حاضر أقل من ١٨ سنة، التسجيل بيكون من ولي الأمر أو بموافقته.

التواصل

لو بتدوّر على بياناتك في إيفينت معيّن، كلّم المنظّم اللي سجّلت عنده — هو صاحب البيانات دي والمسؤول عنها.